“ފޮރުވާނެ އެއްޗެއް ނޯންނާނެ” ކަމަށް ބުނެ ވެރިކަމަށް އައި ރައީސް މުއިއްޒުގެ ސަރުކާރުން ގެދޮރުވެރިކޮށް ކުރުމުގެ ސްކީމުގެ ދަށުން ފުލެޓް ލިބުނު ފަރާތްތަކުގެ މައުލޫމާތު ދިނުމަށް އިންކާރުކޮށްފައި ވާތީ، ހައުސިންގ މިނިސްޓްރީގެ އިސް މުވައްޒަފުންތަކެއްގެ މައްޗަށް ދައުވާކުރުމަށް އިންފޮމޭޝަން ކޮމިޝަނަރުގެ އޮފީހުން ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ. މައުލޫމާތު ލިބޭ ގޮތުގައި މިއީ އާރުޓީއައި ޤާނޫނުގެ ދަށުން ދައުވާކުރުމަށް ފޮނުވޭ ފުރަތަމަ މައްސަލައެވެ.
އައިކޮމްގެ އަމުރަށް ނުކިޔަމަންތެރިވި ހައުސިންގ މިނިސްޓްރީގެ މުވައްޒަފުންގެ ތެރޭގައި ކުރީގެ އިންފޮމޭޝަން އޮފިސަރ ޒަހާނަތު، މިހާރުގެ އިންފޮމޭޝަން އޮފިސަރު މިފްޒަލް އަދި ލީގަލް އޮފިސަރ އީމަން ހިމެނެއެވެ. މި މައްސަލައިގައި އަމިއްލަ ފަރާތަކުން އެދިފައިވަނީ ގެދޮރުވެރިކުރުމުގެ ސްކީމްގެ ދަށުން ފުލެޓް ލިބުނު މީހުންނާ ބެހޭގޮތުން އޭސީސީން ހިންގި ތަޙުޤީޤުގައި އޭނާއަކީ ފްލެޓް ލިބިފައިވާ މީހެއްތޯ ސާފުކުރުމަށެވެ.
ރައީސް މުއިއްޒު ވެރިކަމަށް ވަޑައިގަތީ “ހާމަކަން ބޮޑު ސަރުކާރެއް” ޤާއިމްކޮށް، “އާރުޓީއައި ހުށަހަޅަން ނުޖެހޭނެ” ކަމަށް ވައުދުވެވަޑައިގެންނެވެ. ނަމަވެސް މިހާރު އޭގެ އިދިކޮޅަށް ޢަމަލުކުރަމުންދާކަން މި މައްސަލައިން ހާމަވެއެވެ. މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ 65 ވަނަ މާއްދާގެ ދަށުން އިންފޮމޭޝަން ކޮމިޝަނަރުގެ ނިންމުމަށް ޢަމަލުނުކޮށް 45 ދުވަސް ފާއިތުވުމުން، ޤާނޫނީ އަމުރަށް ނުކިޔަމަންތެރިވުމުގެ ދަޢުވާ ކުރުމަށް ޕީޖީ އޮފީހަށް ފޮނުވުމުގެ ބާރު އައިކޮމަށް ލިބިދެއެވެ.