2025 ނޮވެމްބަރު 19 ގައި ރަޝިޔާގެ ސަރުކާރުން ރާއްޖެއަށް ރަސްމީ ސިޔާސީ ނޯޓެއް ފޮނުވައިފި ވެއެވެ. މި ނޯޓާއި ގުޅިގެން އެވާހަކަ އޭޖީ އޮފީހާއި، ފޮރިންގ މިނިސްޓްރީގެ އިސްވެރިން ތިބޭ ވަޓްސްއެޕް ގްރޫޕަކަށް ފޮނުވިއެވެ. އެކަމާއި ކަންބޮޑުވެ އޭޖީއޯގެ ވަކީލު ނަދާ ހިއްސާކުރި ޑިޕްލޮމެޓިކް ނޯޓަކީ ކުނި ކަމަށް ބުނެ، ރައީސް މުއިއްޒު އާއި ގާތް ގުޅުމެއް އޮންނަ އދ އަށް ރާއްޖެއިން ކަނޑައަޅާފައި ހުންނަ (ސަފީރު) އަލިނީ ނަސީރު މުހައްމަދު ޖަވާބު ދީފައި ވެއެވެ. އަދި ގްރޫޕުގެ މެންބަރުންނަށް އެ ނޯޓު “އިގްނޯ (އަޅާ ނުލުމަށް)” އަންގާފައިވެ އެވެ.
މީގެ އިތުރުން އެ ގުރޫޕްގައި ތިބި ސަރުކާރުގެ އިސް ދެ ފަރާތެއް ހޭ އިމޯޖީއަކުން އެއަށް މަލާމާތްކޮށް ރައްދު ދިނެވެ. އޭގެ ތެރޭގައި ރާއްޖޭގެ ޚާރިޖީ ވަޒީރު އަބްދުﷲ ޚަލީލް ހިމެނޭކަމަށް ސޯޝަލް މީޑިޔާގައި އެމައުލޫމާތު ލީކު ކޮށްލި ފަރާތުން ބުނެއެވެ.
ރާއްޖެއިން މިހާތަނަށް މަސައްކަތް ކުރަމުން އައީ، ރަސްމީ ސިޔާސީ ނޯޓުތަކަށް އުސޫލުގެ ތެރެއިން ރައްދު ދީގެންނެވެ. ރާއްޖޭގެ ތާރީޚުގައި ދުވަހަކުވެސް ގައުމަކުން ފޮނުވާ ރަސްމީ ޑިޕްލޮމެޓިކް ލިޔުމަކަށް ކުޑާމީސްކޮށް ހީ މަލާމާތްކޮށް ނަހަދައެވެ. އެއީ ދުނިޔޭގެ އެއްވެސް ބަޔަކު އުޅޭ އުޅުމެއް ވެސް ނޫނެވެ.
ގައުމުތަކަށް އިހްތިރާމު ނުކުރުމަކީ ރާއްޖެ ބާކީވެ، ބޭރުގެ އެހީ އާއި ވިޔަފާރި ނުލިބި ޑޮލަރަށް ދަތިވެފައިވާ ސަބެބެވެ. އދ ގެ ސެކިއުރިޓީ ކައުންސިލްގެ ދާއިމީ މެންބަރަކު ކަމުގައިވާ ރަޝިޔާގެ ރަސްމީ ނޯޓަކަށް މިގޮތަށް ހިތުމަކީ ރާއްޖެއަށް ގެއްލުންވާނެ ކަމެކެވެ. އެ ގެއްލުން ބަރުދާސްތު ކުރަން ޖެހެނީ ދިވެހި ރައްޔިތުންނަށެވެ. ރައީސް މުއިއްޒު އާއި އެމަނިކުފާނުގެ ވަޒީރުން ތިއްބެވީ ނުހަނު މުއްސަނދި ކަމުގައެވެ.
އިހްތިރާމާއި އަދަބު ބެހެއްޓުމަކީ ޚާރިޖީ ސިޔާސީ މުއާމަލާތުގެ އަސާސް އެވެ. އެންމެ އާދައިގެ ޑިޕްލޮމެޓިކް ނޯމްއެވެ. އެވަރުވެސް މި ސަރުކާރުގެ ވެރިންގެ ކިބާގައި ނެތްކަމީ ދިވެހި ޤައުމަށް ލިބިފައިވާ ބޮޑު ގެއްލުމެކެވެ.